施政報告五大皆空
宜家潮流興數吓字數當大數據，不妨攞 #施政報告 嚟玩吓。不過帶定頭盔先，今年篇幅大減，得番半份，大部分措施放咗喺附篇，所以管治、青年嗰啲專章冇喺正文出現，難啲比較。
房屋、土地成為重點，提到最多嘅係供應、公屋、公營、規劃、收回、重建。政府一直唔肯利用《#收回土地條例》，講法係怕司法覆核要打好耐官司，今次算係民間組織成功爭取。不過要重建九龍東三條寮屋村，以及向新界鄉紳收地，保育、賠償問題又係另一場角力。
所謂「含金量很高」，原來係大肆派錢，津貼、資助講咗成廿次。學生派錢，綜援又派錢。最大手筆係「#N無津貼」，合乎申請公屋資格就可以攞錢。退休保障講咗咁耐，周永新嘅全民老年金被封殺，連「有經濟需要」方案都唔肯落實。宜家全年齡只要夠窮就有津貼，當年錢從何來嘅問題消失得無影無蹤。
窮人派錢，中產借錢。呢幾日最多人討論嘅，一定係放寬 #按揭成數。單位、出售、首置都喺正文出現超過十次，千方百計提升置業率。睇唔透係咪想全香港人搭沉船，不過有計劃有預備嘅人，唔夠錢都會靠父幹入市，冇計劃冇預備嘅，幾大誘因都唔會綁死三十年。無疑上樓係輕鬆咗，但係嗰班覺得樓價離晒譜，唔值得為供樓奉獻自己青春，先係最大怨氣，對未來最感絕望嘅人喎。
面對政治訴求，政府開咗張經濟上流嘅藥單，又點會唔係將牛頭搭上馬嘴呢？